Løgtingið hevur í dag havt fyrstu viðgerð av uppskotinum um nýggjan Fjøruveg í Runavík. Sambært uppskotinum verður landsins partur av vegagerðini mettur at kosta 35 mió. krónur, men hetta talið skal takast við stórum fyrivarni, sambært uppskotinum. Uppskotið sigur nevniliga, at kostnaðarmetingin byggir bara á eitt skitsuprosjekt, nógvar fyrireikingar eru eftir at gera, og ikki fyrr enn øll verkætlanin er prosjekterað, verkætlanin er boðin út, tilboðini eru komin inn, samráðingar hava verið við arbeiðstakarar, og endaligur sáttmáli er gjørdur, ber til at siga, hvør kostnaðurin verður. Eisini stendur í uppskotinum, at tað kunnu koma støður fyri í byggitilgongdini, sum broyta kostnaðin.

Tann 16. januar segði Heðin Mortensen, landsstýrismaður, í einum tíðindaskrivi, at gongd nú kemur á Fjøruvegin í Runavík, og at í 2019 játtar landið 4 mió. krónur til at projekterað vegin. Eisini stóð í tíðindaskrivinum, at alt er tikið við í verklagslógina.

Men nú verklagslógin er komin í tingið stendur í uppskotinum, at eftir íløguætlan landsstýrisins verður ongin peningur játtaður til Fjøruvegin tey næstu árini.

Sostatt skal løgtingið taka støðu til eina verklagslóg, sum eingin kennir kostnaðin av, og eingir pengar verða játtaðir til ætlanina tey komandi árini.

Verður uppskotið samtykt, so fær landsstýrismaðurin heimild at gera ein veg, sum hann ongar pengar hevur til, og lógin sum gevur hon heimildina fer, sambært uppskotinum, úr gildi aftur tann 31. desember 2028.