So kom Markus
Nýggjasta skipið í grønlendska flotanum, Markus, kom á Fuglafjørð í morgun. Har tóku teir olju, áðrenn leiðin lá til Havnar eftir trolútgerð frá Vónini og lemmar frá Rock í Vági.
Sigast má, at Markus er bæði eitt stórt og væl útgjørt rækjuskip, sum reiðaríið Qajaq Trawl í Nuuk hevur latið byggjað í Vigo í Spania fyri góðar 300 milliónir krónur.
Hann er 81 metrar langur og 17 metrar breiður. Motorurin er ein Bergen Diesel á 5400 KW.
Hann lastar umleið 800 tons av rækjum, sum standa á plattum. Tá standa 21 eskjur á hædd á hvørjum platti. Lastin hevur tvær hæddir.
Markus skal royna í Vesturgrønlandi eftir rækjum við tveimum trolum.
Hóast frystiorkan er heili 180 tons um samdøgnið, so rokna teir ikki við at kunna arbeiða “meiri” enn umleið 120 tons.
Dupult manning er til skipið, og skiparar eru Suni Jakobsen og Arni Simonsen. 23 mans eru á hvørjari vakt. Bæði kvotan og manningin á fyrrverandi Markusi, sum er seldur, verður flutt yvir á hendan Markus.
Sjómanstrúboðarin vitjaði umborð í morgun og heilsaði uppá manningina.
Føroyska Sjómansmissiónin ynskir manningini og reiðarínum til lukku og Guds signing við Markusi.
Sí myndir her: https://www.facebook.com/sjomansmissionin
Mest lisið í farnu viku
Samband
Heygsvegur 8
490 Strendur