Føroyski útflutningurin av fiskavørum minkaði frá 2017 til 2018.

Tilsamans útfluttu vit fiskavørur fyri 7,5 mia. krónur í fjør, og tað er 900 mió. krónur minni enn í 2017.

“Hetta er sera stór minking, men tað skal eisini samanberast við, at undanfarnu 2 árini vaks útflutningurin av fiskavørum 1,7 mia. krónur,” sigur Hagstovan.

Útflyta mest til Russlands

Russland er tað landið, sum vit útflyta nógv mest til. Í fjør seldu vit fiskavørur til Russlands fyri nærum 2 mia. krónur, sum er meira enn ein fjórðingur av øllum útflutninginum av fiskavørum.

Størsta minkingin í útflutninginum av fiskavørum í fjør var í útflutninginum til Týsklands. Har minkaði útflutningurin við 539 mió. krónum.

Hava havt stóran vøkstur tey undanfarnu árini

Hyggja vit 10 ár aftur í tíðina, so hava vit havt ein støðugan vøkstur í útflutningsvirðinum øll árini, og í 2018 seldu vit fiskavørur fyri 3,8 mia. krónur meira enn í 2009. Talan er um meir enn eina tvífalding í virði.

Í nøgd er vøksturin minni, hóast tað eisini hevur verið vøkstur flestu árini. Samlað er nøgdin vaksin 56% hesi 10 árini.

Nýggjastu tølini vísa aftur vøkstur í útflutninginum

Okkurt bendir á, at afturgongdin í 2018 verður vend til framgongd í 2019. Tølini fyri útflutningin frá november 2018 til januar 2019 vísa, at útflutningurin hesar tríggjar mánaðirnar var 18% størri enn hann var somu mánaðir eitt ár frammanundan. Tað er serliga útflutningurin av laksi sum er vaksin nógv hesar mánaðirnar, men samstundis er stór minking í útflutninginum av uppsjóvarfiski.