Á tingfudinum í morgin fer løgtingið at hava fyrstu viðgerð av sokallaða “Vælferðarpakkanum”, sum Eyðgunn Samuelsen, landsstýriskvinna, hevur lagt fram.

Valferðarpakkin er ein samling við 6 ymiskum lógaruppskotum, ið viðvíkja borgarum, sum hava tørv á sosialum tænastum. Lógirnar skulu eftir ætlan koma í staðin fyri gomlu forsorgarlógina, sum ikki longur verður hildin at vera tíðarhóskandi.

Eyðgunn Samuelsen, landsstýriskvinna, segði, tá uppskotini vórðu løgd fyri løgtingið, at eitt høvuðsmál við nýggja lógarpakkanum er í størri mun at veita sosialar tænastur við støði í tørvinum hjá tí einstaka og ikki útfrá, hvørjar tænastur eru tøkar.

Í lógini verður ásett, at borgarin skal takast uppá ráð, fáa skjóta og góða ráðgeving og í heila tikið stuðlast, so hann kann liva eitt so vanligt lív sum gjørligt. Dentur verður lagdur á tann fyribyrgjandi partin, og at veitingar og tænastur skulu virka og eggja til størri sjálvhjálpni, segði Almannamálaráðið í einum tíðindaskrivi, tá uppskotini vórðu løgd fram.

Umframt “Vælferðarpakkan” hevur løgtingið eisini fyrstu viðgerð av einum uppskoti um at hækkað familjuískoyti til familjur við serliga lágum inntøkum og familjuískoyti til kvinnur, sum uppihalda sær á kreppumiðstøð. Nakrar aðru viðgerðir eru eisini á skránni.

Tingfundurin í morgin byrjar klokkan 11.