BankNordik fer at løða bilar
Meðan bensinbilar koyra til bensinstøðirnar fyri at fylla tangan, so skulu el-bilar koyra til bankan, fyri at fylla battaríið.
Sum tann fyrsti føroyski peningastovnurin fer BankNordik nú undir at veita viðskiftafólkum lán við lagaligari rentu til el-bilar. Samstundis fer bankin at keypa og seta upp løðingarstøðir við allar bankadeildir kring landið, har tað verður ókeypis at løða bilin.
Eftirspurningurin eftir el-bilum økist
Ymisk politisk stig eru tikin, ið skulu eggja fólki til at velja ein el-bil, tá ið gamli diesel- ella bensinrikni bilurin skal skiftast út. Rindað verður hvørki skrásetingargjald, meirvirðisgjald ella vegskattur fyri el-bilar. Við nýggja el-billáninum hjá BankNordik fáa føroyingar uppaftur ein fíggjarligan fyrimun, tá ið teir keypa ein elbil.
Tøl frá Akstovuni vísa, at meðan 37 el-akfør vóru skrásett í Føroyum 1. januar í 2018, so var talið í februar í ár hækkað upp í 126, og eftirspurningurin eftir el-bilum er í støðugum vøkstri.
“Alsamt fleiri føroyingar keypa sær elbil, og við nýggja elbilláninum vilja vit styðja uppundir jaligu gongdina og geva okkara íkast til, at elbilar gerast ein skilagóð íløga fyri bæði umhvørvið og pengapungin,” sigur Turið F. Arge, rakstrarstjóri í BankNordik.
Hon sigur, at bankin hevur í fleiri ár veitt orkulán við serliga lagaligari rentu til orkusparandi ábøtur á bústaðir, og nú fer tað so eisini at loysa seg at velja umhvørvisvinarligu loysnina, tá ið bilurin skal veljast.
Við at seta løðingarstøðir upp við allar deildir bankans, er ætlanin at gera tað eitt sindur lættari hjá viðskiftafólkum at hava elbil.
Bankin skal sjálvur hava el-bilar
So hvørt sum bilarnir hjá BankNordik-samtakinum skulu skiftast út, fer bankin eisini sjálvur at leggja dent á at velja el-bilar.
Nýggja el-billánið verður 0,5% bíligari enn vanliga billánið, og tað fer at bera til at lána upp til 300.000 kr. Upphæddir omanfyri 300.000 kr. fara at fylgja rentuni á vanliga billáninum.
Mest lisið í farnu viku
Samband
Heygsvegur 8
490 Strendur