Vindrøkt søkir um loyvi at tvífalda vindorkuna í Føroyum
Kunnu fara undir framleiðslu í Hoyvíkshaganum longu í august.
“Longu í august í ár kann Vindrøkt fara undir at seta upp seks vindmyllur í Hoyvíkshaganum, um myndugleikarnir bera skjótt at í viðgerðini av umsókn felagsins.” Tað stendur í einum tíðindaskrivi, sum felagið sendi miðlunum í morgun.
Vindrøkt sigur, at talan er um eina tvífaldan av vindorkuframleiðsluni í Føroyum, tí er hetta eitt týðandi stig á leiðini ímóti einum grønari Føroyum.
Vindrøkt hevur í dag latið inn umsókn til Umhvørvisstovuna um loyvi til at framleiða ravmagn úr vindorku frá seks vindmyllum á 3 MW, ið skulu setast upp á økinum við Gellingarklett á Hoyvíksgarði.
Orsøkin til, at umsóknin um loyvi verður latin inn júst nú er, at Fiskimálaráðið í farnu viku gav festaranum viðhald í kæruni um, at Búnaðarstovan í fjør tók avgerð um at afturkalla tilsøgnina til festaran um lendið á Gellingarkletti.
”Orkumyndugleikin hevur í almennum viðmerkingum sagt seg hava góðar vónir um, at vit nú eftir umsókn kunnu koma á mál við eini avtalu um vindorkuframleiðslu í Hoyvíkshaganum. Tað fegnast vit um, tí tað eru vit eisini fullvísir í fer at eydnast,” sigur Jóhan í Niðristovu, stjóri í Vindrøkt. ”Tá vit hava bygt hesa vindmyllulundina, hava vit tvífalda vindorkuframleiðslumegina í Føroyum. Soleiðis vil 30% av ravmagnsframleiðsluni í Føroyum stava frá vindorku eftir hetta. Í dag er tað einans 15%,” sigur hann.
Drúgvar forkanningar eru gjørdar
Tað var annars longu í 2005, at Sigert Patursson, festari á Hoyvíksgarði, søkti um og fekk tilsøgn um leigusáttmála til lendið frá Búnaðarstovuni til at byggja vindmyllur á økinum. Vindrøkt hevur gjørt ein nýtslusáttmála við bóndan um økið, har vindmyllurnar ætlandi verða settar upp. Í samráð við bóndan hevur Vindrøkt gjørt drúgvar og kostnaðarmiklar kanningar av økinum, fyri neyvt at staðfesta, hvar tað er mest skynsamt at seta vindmyllur upp. Eisini eru umfatandi kanningar gjørdar av, hvat slag av vindmyllum eru best egnaðar í hesum førinum.
Vindrøkt hevur drúgvar royndir innan vindorkuframleiðslu og vóru teir fyrstu sum veittu vinnuliga vindorku til føroyska samfelagið. Tær tríggjar vindmyllurnar hjá Vindrøkt á Mýrunum í Vestmanna vórðu settar upp í 2003 og hava síðani tá framleitt áleið 100 GWT. Hesar vindmyllurnar hava so at siga ikki verið óvirknar síðani.
Í fjørsummar styrkti Vindrøkt seg við orkufelagnum Effo sum partaeigara.
Mest lisið í farnu viku
Samband
Heygsvegur 8
490 Strendur