Norrønafelagið viðger málspurningin
Pallborðsfundur í Norðurlandahúsinum mikudagin.
“Eru vit við at missa tað mentala undirstøðukervið í Norðurlondum?” Tað spyr Norrønafelagið, sum mikudagin skipar fyri tiltaki í Norðurlandahúsinum, har hesin spurningurin verður umrøddur.
“Eins væl og tað hevur týdning at hava eitt gott undirstøðukervi, tá tað snýr seg um vega-, tok-, ferju- og flogsamband í Norðurlondum, er tað eisini av týdningi at eiga eitt mentalt undirstøðukervi, sum fyritreyt fyri at vit norðbúgvar fata og skilja hvønn annan. Men er henda felags fatanin við at fara fyri bakka?” spyr felagið.
Felagið spyr eisini, um vit hava slept skandinaviska málfelagsskapinum, sum einaferð bant okkum saman, nú alsamt fleiri norðurlendingar eru farin at málbera seg á øðrum fremmandamáli? Eisini spyr felagið, um tað var skilagott at taka danskt burtur úr undirvísingini á miðnámi?
100 ár síðani fyrstu norrønu feløgini vórðu stovna
Í sambandi við at norrønu feløgini í ár hátíðarhalda hundrað ára stovningardagin fyri teimum fyrstu feløgunum, setur Norrøna Felagið í Føroyum saman við Norðurlandahúsinum málspurningin á breddan.
Skipað verður fyri orðaskifti við luttøku av Høgna Hoydal, landsstýrismanni við ábyrgd fyri norrøna samstarvinum, Barbaru Gaardlykke Apol, forkvinnu í ungdóms-norðurlandaráðnum og Kate Sanderson, fyrrverandi sendikvinnu Føroya í Brússel. Jákup Sørensen, týðari og ráðgevi hjá NORA, leggur fyri og stýrir orðaskiftinum.
Tiltakið verður í forhøllini í Norðurlandahúsinum mikudagin 20. mars klokkan 17 til 18.
Talan er um eitt av nátturðabita-tiltøkunum hjá Norðurlandahúsinum, og tað vil siga, at høvi verður at keypa ein bita at eta áðrenn ella meðan tiltakið er.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur