Røðan hjá Boga Hansen til veðurlagsverkfallið fríggjadagin
"Ein lítil helvt av okkara útláti stavar frá fiskiskipum. Hana torir eingin at nerta. Tað er so heldur ikki ein trupulleiki, sum er lættur at loysa; men tað nyttar einki at stinga høvdið í sandin og ignorera hann. Hetta átti at verðið ein centralur partur av okkara langtíðarætlan fyri einum fiskivinnupolitikki", segði Bogi Hansen, havfrøðingur, m.a. í síni røðu á Vaglinum síðsta fríggjadag.
Føroya Náttúru- og Umhvørvisfelag hevur í dag lagt alla røðuna hjá Boga Hansen á netið. Røðan kann lesast niðriundir:
Hey tit
Eg rokni við, at nógv tykkara eru so eviga troytt av at hoyra Boga Hansen tosa um veðurlagsbroytingar.
Eg skal siga tykkum, at eg eri eisini so eviga troyttur av at hoyra Boga Hansen tosa um veðurlagsbroytingar.
Men samstundis, so eri eg so eviga troyttur av fólkunum í hasum hvíta húsinum.
Fyri 10-20 árum síðan segði ein stórur partur av teimum, at tey trúðu ikki upp á, at menniskjað er farið at broyta veðurlagið.
Tað kann sjálvandi tykjast tollut, ikki at trúgva natúrlógunum, men tað er so tað, tað er.
Nú siga tey ikki tað longur – í hvussu so er tey flestu, sum tað ljóðar.
Tit kunnu siga, at so eru tey frægari enn Donald Trump, sum jú forrestin eisini situr í einum hvítum húsi
Men hann veit mann tross alt, hvar man hevur. Hann ger tað, hann sigur.
Fólkini í okkara hvíta húsi siga seg vilja hava einar grønar Føroyar; men gera í stóran mun beint tað øvuta.
Føroyar hava tikið undir við París sáttmálanum.
Skal nøkur vón verða um at røkka málinum í honum, skal samlaða netto-útlátið av CO2 í heiminum verða farið niður í helvt í 2030 og verða heilt burturi í 2050.
Og okkara politikarar siga seg fara at fylgja tí.
Og hvussu gongur so tað ?
Ja, ein lítil helvt av okkara útláti stavar frá fiskiskipum. Hana torir eingin at nerta.
Tað er so heldur ikki ein trupulleiki, sum er lættur at loysa; men tað nyttar einki at stinga høvdið í sandin og ignorera hann.
Hetta átti at verðið ein centralur partur av okkara langtíðarætlan fyri einum fiskivinnupolitikki.
Men fara vit upp á land, so er Løgtingið eftir tí eg skilji samt um, at Føroyar skulu verða grønar í 2030.
Frálíkt
Og tey hava eina strategi, har eitt høvuðspoint er, at orkunýtslan skal fara frá olju til el.
Oljufýr til hitapumpur
Vanligir bilar til elbilar o.s.fr.
Eisini frálíkt, men hvussu gongur so at realisera tað.
Landsstýrið gjørdi eina fyrstu roynd við einum uppskoti um lægri elprísir til hitapumpur og elbilar.
Tað varð viðtikið, men við teprum meiriluta.
Har skal ikki nógv broytast skeivan veg í løgtinginum, um tann parturin av strategiini skal gjøgnumførast.
Hin parturin av strategiini er at útbyggja elframleiðsluna og gera hana grøna.
Út við olju, inn við vindi, vatni, sólorku og kanska øðrum varandi orkukeldum.
Eisini frálíkt; og so hevði tú hildið, at Løgtingið fór undir at smíða lógir, sum kunnu stuðla tí
Men har hevur Løgtingið opinbart ein trupulleiki, at næstan øll elframleiðslan í Føroyum kemur frá einum almennum felagsskapi – SEV
Og tað hóskar ikki til galdandi ideologi í okkara hvíta húsi.
Tey vilja hava tey privatu inn.
Tey vilja hava meiri kapping. Hetta heilaga orðið “KAPPING”
So halda tey opinbart, at restin kemur av sær sjálvum.
Og tá so tað privata ofta ikki klárar at kappast við SEV
Ja, so fer Løgtingið inn at gera tað truplari hjá SEV
Nú vilja tey opinbart býta SEV sundur, soleiðis at tann heilaga kappingin kann valda øllum.
Jú lat endiliga tey privatu sleppa við.
Men at rokna við, at tað loysir allar trupulleikar, er bláoygt.
Og at rokna við, at tað skal verða bíligari fyri okkum borgarar, er meiri enn bláoygt.
Hetta er Eysturoyartunnilin umaftur.
Hvussu nógvar milliardir hevði hann kostað okkum borgarum meiri, um tað upprunaliga privata initiativið hevði verið gjøgnumført.
Men tað mest absurda er, at samstundis, sum Føroyar hava tikið undir við Paríssáttmálanum, so fara vit enn einaferð at útbjóða oljuleiting við Føroyar.
Og eftir øllum at døma er alt Løgtingið samt um tað.
Skulu málini í Paríssáttmálanum røkkast, skal nettoútlátið av CO2, sum sagt, verða komið niður á 0 í 2050, t.v.s. um gott 30 ár.
Sjálvt við verandi oljunýtslu røkka tær kendu keldurnar væl longur enn tað.
So heimurin hevur ivaleyst av olju longu sum er.
At taka undir við Paríssáttmálanum og samstundis fara undir oljuleiting er sum at skjóta seg sjálvan í fótin.
Og tá hava vit ikki hugsað um tann skaða, sum dálking frá oljuvinnu kann hava á okkara fiskivinnu og alivinnu.
So nei. Tað er tíverri ikki nógv sum bendir á, at Føroyar verða grønar hvørki í 2030 ella í 2050.
Ikki uttan at hatta hvíta húsið verður nógv grønari.
Mest lisið í farnu viku
Samband
Heygsvegur 8
490 Strendur