Í kvøld skipa Kvinna og Føroya Tele fyri einum temakvøldi, sum setur sjóneykuna á børn og skíggjar. 

Í innbjóðingini verður skrivað, at hóast tøknin hevur ment okkara samfelag, so hevur tøknin eisini eyðsýndar avbjóðingar við sær, og hetta serliga tá talan er um børnini, sum í stóran mun vaksa upp við einum skíggja frammanfyri sær. Tað talgilda eigur at vera partur av uppalingini av okkara børnum, sigur ein serfrøðingur í nýggjastu útgávuni av Kvinnu. Men hvussu bera vit – foreldur so væl sum alt samfelagið - okkum at?

Hesin spurningur verður settur á skrá, við viðgerð og kjaki í Klingruni í Hoyvík í kvøld klokkan 19.00. 

At greiða frá avleiðingunum av ov nógvari skíggjanýtslu kemur Ann Mari Petersen, námsfrøðingur, Eva Skeel Nolsøe greiður frá, hvussu hon stýrir skíggjanýtsluni hjá børnunum niður í minsta minutt, Elin Michelsen kemur at geva innlit og prei til góðar appir til børn. Og Jan Ziskasen kemur at siga sína hugsan um hetta evnið, sum hann kallar “eina samfelagsábyrgd”. Millum stuttu fyrilestrarnar verða steðgir við ábiti og møguleiki verður at gera viðmerkingar ella seta spurningar umvegis menti.com. Tað skrivar fyrireikararnir í lýsingini fyri temakvøldið.