Heimsins besti svimjari kemur til Føroyar
Hin 8. til 11. apríl 2019 fær føroysk svimjing vitjan av heimsins besta svimjara, og av venjara hennara, sum á HM í Kina eisini varð kosin hin besti í heiminum. Tað skrivar Svimjisamband Føroya.
Talan er um ungarsku Katinku Hosszú, sum á OL 2016 í Rio de Janeiro vann gull í 100 rygg og í 200 og 400 blandað. Hon hevur hartil millum annað vunnið gull í 400 blandað á HM í Rom í 2009, á HM í Barcelona í 2013, á HM í Kazan í 2015 og á HM í Budapest í 2017.
Katinka eigur heimsmetini í 200 og 400 blandað á langgeil og á stuttgeil, umframt heimsmetini í 100 og 200 rygg á stuttgeil. Hon eigur hartil í verandi løtu 9 av 17 ungarskum metum hjá kvinnum á langgeil, og 16 av 18 ungarskum metum hjá kvinnum á stuttgeil.
Tilsamans hevur hon vunnið 3 OL-gull og 1 silvur, 7 HM-gull, 1 silvur og 5 bronsur, umframt m.a. 17 gull á HM á stuttgeil, 14 á EM og 16 á EM á stuttgeil, ella 57 gull á hesum størstu svimjistevnum í heiminum.
Hon hevur tilsamans vunnið eini 399 heiðursmerki á World Cup stevnum.
Katinku Hosszú er ein livandi legenda innanfyri svimjing, og er tað tí eisini nærmast óveruligt fyri okkum í føroysku svimjingini, at hon og venjarin nú koma hendan vegin, at venja ímillum Bergen Swim Festival og Swim Open Stockholm 2019, skrivar Svimjisamband Føroya.
Ætlanin er, at føroyski hópurin til Bergen Swim Festival 2019 ferðast heim og suður til Vágs saman við hesum ungarum hin 8. apríl, at venja fram til hin 11. apríl, tá ið ungarar og eisini nakrir føroyingar fara víðari til Stockholm.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur