Samtykkir løgtingið uppskotið hjá Pálli á Reynatúgvu, løgtingsformanni, um at avtaka fólkatingssessirnar, so fær tað ongar avleiðingar. Talan er um “signalpolitikk”, sum tað ikki ber til at fremja í verki. Tað segði Aksel V. Johannesen, løgmaður, tá hann svaraði einum fyrispurningi frá Bárði Nielsen, løgtingsmanni, á tingfundinum í dag.

Bárur Nielsen spurdi, um løgmaður fór at loyva samgongufólkum at atkvøða fyri uppskotinum hjá løgtingsformanninum, og um hann fór at seta tað í verk, um tað bleiv samtykt.

Løgmaður svaraði, at løgtingsfólk eru bara bundin av síni egnu sannføring, og tí fer tað ikki at fáa avleiðingar fyri tey, um tey atkvøða fyri uppskotinum.

“Hinvegin, so er talan ikki um eitt lógaruppskot, men heldur um eitt politiskt signal,” segði hann.

“Av tí at tað ikki ber til at avtaka fólkatingssessirnar við vanligari lóg, so verður ikki meira gjørt við málið, um tað verður samtykt,” segði løgmaður.

Helst verður uppskotið samtykt

Bárður Nielsen segði, at helst er stórur meirluti í tingsalinum fyri uppskotinum, og verður tað samtykt, so hevur Tjóðveldi vunnið ein stórsigur við at taka loysingina gjøgnum bakdyrnar.

Løgmaður svaraði, at tað eru bara tveir møguleikar at avtaka fólkatingssessirnar. Annar er at loysa Føroyar úr ríkinum, og hin er at broyta donsku grundlógina.

“Í báðum førum er neyðugt at hava fólkaatkvøðu um málið,” segði hann.

Hava tunlar størri týdning enn loysingin?

Bárur Nielsen vísti síðani á, at løgmaður hevur áður sagt, at um eitt mál verður samtykt, uttanum samgonguna, so er samgongan farin.

“Ætlar løgmaður at lata hetta málið fara ígjøgnum og lata loysingina byrja henda vegin, meðan í øðrum málum (um tunlar o.a.), so stendur samgongan uppá spæl?” spurdi hann.

Løgmaður svaraði, at tað er komið fyri nakrar ferðir, at samgongufólk hava verið við til at lagt uppskot fram av sínum eintingum.

“Eg havi sagt, at tað er ikki í lagi, og tað er tað heldur ikki í hesum førinum,” segði hann. Hann segði, at talan er bara um signalpolitikk, og hann roknar ikki við at málið verður samtykt.