“Eftirlitsarbeiði hjá TAKS vísir greitt, at fólk, sum leiga út gjøgnum Airbnb, draga ov nógvar útreiðslur frá, tá ið tey geva leiguna upp til skattingar.” Tað sigur Taks í einum tíðindaskrivi í dag.

“Ofta verða upp í 55% av inntøkuni drigin frá, og tað er vanliga alt ov nógv,” sigur Taks. Hetta hevur við sær, at ov lítið verður rindað í skatti.

Vantandi kunning kann vera ein orsøk

Taks veit ikki, hví ov nógv verður drigið frá í skattinum av inntøkum frá Airbnb. Taks vísir tó á, at alt fleiri føroyingar eru farnir at leiga út gjøgnum Airbnb, og hjá mongum er talan um eina nýggja inntøkukeldu.

“Vantandi kunning um, hvussu hon skal gevast upp til skattingar, er helst ein av orsøkunum til, at fólk gera mistøk,” sigur Taks.

Ístandsetingarútreiðslur kunnu ikki dragast frá

Tað er í flestu førum rættiliga avmarkað, hvat ið kann dragast frá, tá ið leigað verður út gjøgnum Airbnb.

“Metast skal altíð um í hvørjum einstøkum føri, men eitt rímiligt boð liggur um 10-15% av leiguinntøkuni og ikki um tey 55%, sum nógv tykjast halda,” sigur Taks. Ein høvuðsregla í hesum sambandi er, at bert útreiðslur í sambandi við nýtslu og slit geva rætt til frádrátt.

“Til ber t.d. ikki at seta eini hús í stand til útleigu og at draga ístandsetingina frá, tí tá er talan um nýgerð og ikki um nýtslu ella slit,” sigur Taks.

TAKS gjørt greiðari kunning um frádráttarreglur

Eftirlitið hjá TAKS vísir, at tørvur er á at upplýsa útleigarar um, hvussu inntøka av Airbnb skal gevast upp, og hvat kann dragast frá. Tí hevur TAKS nú gjørt kunningina um Airbnb-útleigu greiðari, samstundis sum ljós verður varpað á tær skattligu avbjóðingar, sum hendan vaksandi vinnan hevur við sær.

Við árslok í 2018 vóru 551 føroyskir bústaðir skrásettir hjá Airbnb.