Aftaná nógv ár við góðum avkasti, gav 2018 eitt hall hjá kundunum í Betri Pensjón.

“2018 var eitt avbjóðandi ár fyri flest øll pensjónsfeløg í heiminum, og hetta komst fyrst og fremst av, at virðisbrævamarknaðirnir stóðu seg illa – serliga í desember. Tað mista varð tó longu vunnið inn aftur í januar 2019, og gongdin síðani tá hevur eisini verið sera góð,” sigur Betri Pensjón í einum tíðindaskrivi.

“Sum heild eru vit nøgd við úrslitið. Vit megnaðu aftur í 2018 at lækka rakstrarkostnaðin av felagnum,” sigur Helgi L. Petersen, stjóri.

Eins og undanfarin ár økti Betri Pensjón um kundaskaran í 2018. Leypandi inngjøldini frá kundunum vuksu við umleið 10 prosentum í mun til árið fyri. Betri Pensjón styrkir sostatt støðugt sína støðu á Marknaðinum.

“Gongdin fyrstu tveir mánaðirnar í 2019 hevur verið sera góð, so tapið, sum kundarnir høvdu í 2018, eru longu vunnið aftur og reiðiliga tað,” sigur Helgi L. Petersen.

Ársúrslitið hjá Betri Pensjón var eitt avlop á 2,0 mió. krónur. Solvensdekningurin er 257,7 prosent og eginognin er 71,5 mió. krónur. Samansparingin hjá kundum er tilsamans 1.168,7 mió. krónur.