Landsbankin kom við sínari ársfrágreiðing í gjár. Og eins og restin av samfelagnum hevur tað gott, so hevur landskassin tað eisini gott. Men tað er eitt men!. Vit hava hoyrt nógv um niðurgjalding av skuld ella rættari sagt ætlan um at niðurgjalda skuld. Men tað er eitt sindur ivasamt um pengar eru til hetta.

Minstakrav til innistandandi í Landsbankanum var í fjør 2.670 milliónir. Men 24 apríl á kvøldi stóðu bara 2.663 milliónir á konto. Tað er 7 milliónir minni enn lógarkravið. Tískil byrjaði flaggdagurin við negativum kassabeholdningi, sum tó bleiv rætta upp aftur flaggdagin.

Nógv hevur verið tosa um avlop landskassans seinastu árini. Men tað sæst ikki so væl aftur í kassanum. Avlopini fyri 2016-18 eru sambært roknskapinum 158+563+296 mió. ella í alt 1017 milliónir. Hetta skuldi alt annað líka gjørt, at lætt er at niðurgjalda skuld. Gjaldstovan ger dagliga yvirlit yvir gjaldføri landskassans. Fyrsta januar var tøka gjaldførið 3.642 milliónir, meðan lógarkravið var 2.830 milliónir. Tá vóru tí 812 mió. í tøkum peningi.

Hetta er sjálvandi als ikki nóg mikið til at niðurgjalda nógva skuld. Tøkur peningur skiftur ofta 100 milliónir upp og niður ein dag og tí má ein ávísur buffari verða.

Tað stendur tó væl til í landskassanum, men tað eru nógv færri pengar tøkir at niðurgjalda skuld við enn vit geva okkum far um. Soleiðis sum reglurnar og metingarnar eru, krevjast 108 milliónir meira í tøkum gjaldføri við ársenda 2019 enn við ársbyrjan. Tí verður talan um lántøku til at afturgjalda lán, sum fella til gjaldingar í ár. 

30 juni fella 1,3 milliardir til gjaldingar. Stórsta parturin av hesum pengum noyðast vit at lána. Tað var upprunaliga ætlanin at niðurgjalda stórsta partin av hesum láni. Men tað eru heilt einfalt ikki pengar til tað.