Toskurin er framvegis ikki komin fyri seg á Føroyabanka
Hýsan er betri fyri enn nakrantíð, síðani yvirlitstrolingarnar byrjaðu í 1983.
Yvirlitstrolingin hjá Magnusi Heinasyni á Føroyabanka í mars staðfesti enn einaferð, at toskurin er framvegis ikki komin fyri seg á bankanum.
Magnus Heinason fór av Havnini mikukvøldið í farnu viku, og skipi var inni aftur týsmorgunin í hesi vikuni.
Høvuðsendamálið við túrinum var at fáa til vega tilfar, ið skal nýtast í stovnsmetingum av toski, hýsu og upsa, og eisini skuldi vekt, tal og longdarbýti skrásetast fyri øll fiskasløg, ið vórðu veidd. Harumframt skuldu magakanningar gerast av toski, hýsu, upsa, longu og brosmu.
Hóast lítið var til av toski, so sigur Havstovan, at toskurin sum var fingin var sera væl fyri, og nógv var til av nebbasild.
Viðvíkjandi hýsuni, sigur Havstovan, at meira var til av henni enn tað nakrantíð hevur verið síðani yvirlitstrolingarnar byrjaðu í 1983.
Nakað av fiskinum sum var fingin henda túrin varð seldur til matstovuvinnuna og ferðavinnuna í Havn.
Mest lisið í farnu viku
Samband
Heygsvegur 8
490 Strendur