Tróndur í Gøtu fór fyri løtu síðan fullfermdur inn á Runavík at bíða eftir landingartørni. Teir hava umleið 2.500 tons og vænta at sleppa at landa hjá Havsbrún í Fuglafirði um 2 dagar.

Fiskiskapurin er júst byrjaður í Føroyskum sjógvi og svartkjafturin flytir seg norðeftir og nærkast Føroyum. Tá verður uppaftur styttri at sigla. Seinasta ár broytti fiskimálaráðið reglurnar nakrar dagar áðrenn skipini góðust at fiska svartkjaft.

Støðan í ár er tann sama sum seinasta ár. Tað er ikki loyvt at landa uttanlanda. Svartkjafturin versnar í góðsku hvønn dag. Tí missur samfelagið inntøkur tá skip noyðast at bíða eftir landingartørni.

Tróndur í Gøtu hevur umleið 2.500 tons og avreiðingarprísurin uttanlanda sigst verða upp í 40 oyru hægri pr. kilo. Tað er 1 millión, sum onkursvegna verður burtur.