Seinasti uppstillingarfundur hevur verið í Norðstreymoyar Javnaðarfelag og nú er greitt, at tað verða tey bæði Ingilín Didriksen Strøm úr Vestmanna og Jógvan Mørkøre úr Hósvík, sum stilla upp fyri felagið.

Jógvan Mørkøre er kendur hósvíkingur, ikki bara í Norðstreymi men víða um í landinum. Hann hevur nógvar lívsroyndir við sínum 63 árum, ikki minst í kommunupolitikkinum. Sum borgarstjóri í táverandi Hósvíkar kommunu var hann ein av fremstu slóðbrótarunum fyri sera væleydnaðu skipanini og samansjóðingini av teirri nýggju stóru Sunda kommunu, ið kom at fevna víða frá Hósvík til Tjørnuvíkar og um brúnna um Streymin inn í Eysturoynna heilt til Gjáar.

- Eg brenni fyri tí politiska arbeiðinum, og mær dámar best einar Føroyar, har øll hava javnbjóðis møguleikar at liva trygt og væl í okkara samfelag. Tí havi eg játtað at stilla upp fyri Javnaðarflokkin, og eg vil arbeiða fyri bestu lívskorum fyri allar borgarar í Føroyum, sigur Jógvan.

Jógvan er kendur stríðsmaður fyri einum framfýsnum umhvørvispolitikki, hann er arbeiðssamur og stendur við sína hugsan, eisini tá hon ikki er so væl lýdd av øllum.

- Vit hava tørv á virðing fyri hvørjum øðrum, og vit hava tørv á politikarum, sum tora at handla og ikki bara tosa, sigur Jógvan.