Ein ilskur bátamaður hevur sent okkum nakrar reglur um ónøgd við, at bátamenn í Kollafirði leggja sítt føðingardagshald júst 4. mai og ikki hugsa seg betur um.

Hann sigur, at "heldur enn at loysa bátarnar og stuðla undir bátatiltakið á Toftum, ið ikki er so langt vekk úr Kollafirði, hevur Kollafjarðar Bátafelag lagt 20 ára føðingardagin hjá felagnum júst sama dag, sum Bátafestivalurin er á Toftum".  

R7 kennir ikki til hetta málið, men á facebook vanganum hjá Kollafjarðar Bátafelag stendur hetta um føðingardagin.

Á eini plakat stendur at 4. mai 2019 heldur felagið stóran føðingardag og hesin teksturin stendur eisini á vanganum. 

Nevndin í Kollafjarðar Bátafelag: Nú bátafelagið hevur 20 ár á baki, er ætlanin at hátíðarhalda dagin, har øll eru hjartaliga vælkomin.

Bátafelagið varð stovnað í 1999 og hevur verið virkið síðani. Felagið er vaksið nógv, og tað er nú umleið 100 limir. Í hesum tíðarskeiðnum eru nógvar broytingar farnar fram, og felagið hevur havt nógva framgongd. Bátafelagið hevur í samstarv við Tórshavnar kommunu arbeitt við at betra umstøðurnar í bátahylinum hjá bátaeigarum, millum annað hevur kommunan í ár gjørt vesi- og brúsuumstøðurnar sera góðar.

Limirnir hava í longri tíð arbeitt sjálvbodnir við at betra umstøðurnar, bæði innan og uttan fyri felagshúsið, so sum terassu, rampu til rørslutarnaði. Tó er nógv eftir at gera inni í felagshúsinum, og tískil er ætlanin at samla pening inn, so at felagshúsið kann lúka øll krøv.