Hugtakið orka kann brúkast á mangan hátt. Vit brúka øll nógva orku hvønn dag, bæði svarta orku, grøna orku og okkara egnu kropsorku. Til umhvørvisvikuni í Klaksvík hava tey valgt at leggja størstan dent á okkara kropsorku. Høvuðsevnið á umhvørvisvikuni í Kláksvík, sum er í døgunum 6. - 11. mai, er  ”Orkar tú?” 

Seinastu trý árini hevur umhvørvisvikan í Klaksvík verið kallað Slóða fyri, og soleiðis er eisini í ár. 

Í ár verður m.a. eggja øllum í kommununi at brúka sína egnu orku, tá komast skal runt kring býin. Hetta er fyri, at vit í felag brúka orku uppá at fáa ein grønari bý við minni útláti, dálking og larmi. Tá vit brúka okkara egnu orku, minka vit samstundis um ta dálkandi orkuna. Vit koma eisini hvørjum øðrum meira við, tá vit hittast úti á gøtunum til gongu, á súkklu ella øðrum, har vit brúka egna orku.

Við at brúka okkara orku, kunnu vit øll vera við til at slóða fyri at verja okkara umhvørvi og okkum sjálv, skriva fyrireikarinir til fjølmiðlarnir. 

Tað eru Gunnhild Dahl Niclasen og Annika Steintórsdóttir Biskopstø, sum samskipa átakið fyri Klaksvíkar kommunu.

Nógv hevur longu verið á skrá í Klaksvík seinastu dagarnar, og í kvøld verður skipað fyri kjakfundi í Spaniastovu. Har fara m.a. tvær familjur at luttaka, sum hava latið bilin standa í eina viku. 

Á kjakfundinum fara vit at hoyra um, hvussu hevur gingist hesum familjum at royna seg uttan bilin. Eisini fer Sanna A. Dahl at greiða frá um hennara bilfría lív. Magni Mohr frá Fólkaheilsuráðnum fer at tosa um týdningin av, at vit nýta okkara egnu kropsorku. Til síðst verður eitt panel við kommunupolitikarum í Klaksvíkar Kommunu og Sannu og Magna, sum fer at kjakast um býarplanlegging, ferðslu, kropsorku, vælveru og annað, sum er tengt at evninum.

Í morgin verður fyrilestur á Bókasavninum við Kári Mortensen frá Umhvørvisstovuni. Fyrilesturin hevur heitið "Loysir tað seg at skifta til hitapumpu?". Fríggjadagin verður útikonsert. Og leygardagurin er fullur av tiltøkum á Biskupstorgi. Hetta er fyrstu ferð, at Biskupstorgið alment verður tikið í nýtslu. Av rúgvuni av tiltøkum kann nevnast hjólvelting, fyrilestrar um elbilar, framsýningar av grønmetisplanting og søla av mati í leysvekt.

Øll skráin er at síggja á Klaksvík.fo og eisini á facebook síðuni hjá Slóða fyri.