Frá 1. september verður Marjun í Kálvalíð sóknarprestur í Vága prestagjaldi. Tað eru kirkjuráðini í Vága prestagjaldi, Prestafelagið og Mentamálaráðið vorðin samd um.

Vága prestagjald hevur í mong ár havt eina normering á hálvanannan sóknarprest. Norðstreymoyar vestara prestagjald og Vága prestagjald hava samstarvað um tann eina prestin, sum hevur havt bústað í Vestmanna.

Men í januar í ár varð eitt fulltíðar embæti játtað Vága prestagjaldi, og presturin í Vestmanna skal samstundis røkja norðstreymoy burturav. Hetta merkir, at trý embæti verða í Norðstreymoy - tvey í vestara prestagjaldi og eitt í eystara.

Av tí at Marjun í Kálvalíð longu var virkandi prestur í økinum, varð avgjørt, í samráð við avvarandi partar, at hon skal halda fram í nýggja starvinum.