Nýggj app skal hjálpa børnum at halda skil á pengunum
Við eini nýggjari app roynir BankNordik nú at hjálpa børnum at halda skil á penganýtsluni.
Pengaskápið, sum appin eitur, er ein einføld og ókeypis app, sum er serliga væl egnað til at geva børnum yvirlit yvir t.d. lummapengar og samansparing, sigur BankNordik.
Við Pengaskápinum kunnu børn fáa yvirlit yvir, hvussu nógv tey spara saman og brúka. Pengaskápið er serliga ætlað børnum frá sjey ára aldri, og talan er um eina einfalda app á tann hátt, at tað ikki ber til at gera flytingar.
“Tí er eingin vandi fyri, at barnið flytur pengar av kontuni av óvart,” sigur bankin.
Foreldrini velja konturnar
Tað eru foreldrini sum avgera, hvør konta hjá barninum skal knýtast at Pengaskápinum, og sostatt er ikki neyðugt at vísa t.d. barnasamansparingar í appini.
“Við appini vilja vit stuðla undir at geva børnum og ungum eina grundleggjandi fatan av fíggjarviðurskiftum og penganýtslu,” sigur BankNordik.
“Vit vita, at børn fáa áhuga fyri pengum, meðan tey enn eru smá, og tá hava foreldur ein gyltan møguleika at leggja skynsamar pengavanar í børnini. Við Pengaskápinum kunnu børnini longu frá ungum árum fáa eina kenslu av ábyrgd fyri egnum pengum, og tí vóna vit, at børnini fara at fáa gleði av appini,” sigur Turið F. Arge, rakstrarstjóri í BankNordik.
Appin er tøk til telefonir við iOS og Android stýrisskipan.
Mest lisið í farnu viku
Samband
Heygsvegur 8
490 Strendur