Gylta Djurhus Neystabø, Emilia Brockie Hansen og Anni Kate Steinkross Joensen komu víðari í fyrsta undanumfarinum í Barnaprix kappingini, sum var á Torginum í SMS seinasta leygardag.

11 framførslur vóru við í kappingini og allar vóru sera góðar, so tað var ringt hjá dómarunum at velja tey trý, sum skuldi fara víðari, tí støðið var sera høgt. Fleiri av teimum sum ikki komu víðari, søgdu at tað sum hevði størst týdning fyri tey, var at vera við, og tað gjørdi ikki so nógv at tey ikki komu víðari. Fyrireikarnir vóna, at tey halda áfram at syngja og melda til kappingina næsta ár.

Nógv fólk vóru og lurtaðu á Torginum í SMS leygardagin og tað tykist sum um, at øll hava fingið við, at Barnaprix er aftur. Fólk hava tikið tað til sín og áhugin runt landið er nú ovurhonds stórur, skrivar fyrireikarinir fyri Barnaprix kappingini.

Næsta undanumfar verður tann 16. mai tá kappingin verður í Atlantis í Klaksvík kl. 19.00 og 18.mai í Løkshøll kl 15.00.
Kostnaður er 50 kr og tað er einki aldursmark. Sambært fyrireikarunum er fullteknað til kappingina, men tað ber til at koma á bíðilista.