Vilt tú vita hvat, nær og hvar ymiskt hendir í Føroyum? Far inn á www.whatson.fo. Tað skrivar Kunningarstovan í Fuglafirði um nýggja heimasíðu, sum verður sett í verk í dag.  

What’s On samlar øll tiltøk úr øllum landinum á einari síðu, sum ger tað lætt at fáa yvirlit yvir, hvat hendir. Konsertir, framløgur, sjónleikur, matupplivingar og mangt annað.

Á síðuni kanst tú velja ymiskt til og frá, til dømis nær tiltakið er, hvar í landinum tað er ella slag av uppliving, tiltakið hoyrir til. Kunningin finst á føroyskum og enskum. Á heimasíðuni kunnu øll skráseta tiltøk, og kunna seg um, hvørji tiltøk eru runt um í landinum. 

Á whatson.fo ber eisini til, at velja tað øki ein hevur størstan áhuga í, t.d. Eysturoy, síðan velja tað slagið av uppliving, áhugi er í, t.d. tónleik, og so fáa eitt skjótt yvirlit yvir, hvat farast kann til.  Tað krevur bara, at fyriskiparar skráseta síni tiltøk á síðuni.

Skráset títt egna tiltak

Ein og hvør kann skráseta eitt tiltak á What’s On. Skipanin er sera einføld, løtt at brúka og ókeypis. Øll tiltøk, sum verða skrásett, skulu góðkennast áðrenn tey verða løgd út á What’s On. Tað eru kunningarstovurnar kring landið, sum umsita og góðkenna tiltøk, sum verða skrásett í teirra øki.

Fleiri hundrað tiltøk (events) og fleiri enn 400 støð (places) eru longu nú skrásett á What’s On. What’s On er ein sjálvstøðug síða, sum verður at finna á síðum hjá kunningarstovum og tíðindaportalum, umframt ein undirsíða hjá Visit Faroe Islands.

Nógvir útlendingar nýta longu What’s On at finna út av, hvat hendir í Føroyum. Við tað, at kunningin nú eisini er at finna áføroyskum, verður lagt upp til, at føroyingar eisini fáa høvi at nýta síðuna.