JT electric hevur gjørt eitt av størstu fóðurskipum í heiminum
Kann lasta heili 850 tons av alifóðri.
Í síðstu viku kom eitt av heimsins størstu fóðurskipum til landið. Talan er um eitt skip, sum JT electric í samstarvi við Sandgrevstur hevur gjørt til alifelagið Luna.
Fóðurskipið kann lasta heili 850 tons av fóðri og kann útbyggjast til 1400 tons.
Skipið skal liggja ankrað við alibrúkið á Víkum norðanfyri Vágar. Økið er eitt av harðbalnastu støðum í heiminum, tá talan er um aling á sjónum, og tað setur serlig krøv til skipanirnar umborð. Stór atlit eru samstundis tikin til umhvørvið, millum annað við at ljóðið frá blásarum og motorum ikki skal hoyrast. Liturin á skipinum ger eisini, at tað fellur betur inn í landslagið.
“Hetta er størsta einstaka verkætlan hjá okkum,” sigur Suni Justinussen, stjóri á JT electric.
“Talan er um triðja fóðurskipið, vit hava selt til Luna, og vit eru glað fyri, at teir enn einaferð valdu at keypa eina føroyska loysn,” sigur hann.
Hetta er samstundis fóðurskip nr. 9, sum JT electric hevur gjørt saman við Sandgrevstri. Skipið, sum er umbygt í Póllandi, har føroyingar hava leitt verkætlanina. Skipið er síðani útgjørt við nýmótans, føroyskt mentari fóðurskipan frá JT electric, sum bæði kann fóðra laks og rognkelsi ígjøgnum somu skipan.
33 fólk arbeiða hjá JT Electric.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur