Mikukvøldið verður pallborðskjak um orku, veðurlagsbroytingar og náttúruvernd. Umboð úr øllum politisku flokkunum, sum stilla upp til Løgtingsvalið, verða við og eisini verður eitt toymi av serfrøðingum, sum hevur møguleika at koma við rættleiðingum og viðmerkingum, um tey halda tað vera neyðugt og gagnligt fyri kjakið.

Tað eru Ringrás, FNU og Norðurlandahúsið, sum skipa fyri pallborðskjakinum. 

Avleiðingarnar av mannaskaptu veðurlagsbroytingunum gerast alsamt týðiligari, og vit verða mint á, at vit mugu seta átøk í verk beinanvegin fyri at basa teimum. Sambært IPCC er neyðugt at minka útlátið við heili 45% fram til 2030 í mun til útlátið í 2010.

Hví skulu vit minka um útlátið, og hvørjar verða avleiðingarnar um okkara leiðir, um vit lata standa við? Hvat skulu vit ítøkiliga gera fyri at basa avleiðingarnar av veðurlagsbroytingunum? Hvussu kunnu Føroyar minka um okkara útlát? Og hvussu varðveita vit samstundis okkara náttúru? Hetta eru nakrir av spurningunum sum eru á skrá mikukvøldið.

Umboðini í faktatjektoyminum vera:

- Ragnheiður Bogadóttir, humanvistfrøðingur
- Kári Mortensen, deildarleiðari á Orkudeildini hjá Umhvørvisstovuni
- Bogi Hansen, havfrøðingur
- Jógvan D. Hansen, heimspekingur

Skráin fyri kvøldið:

Kl. 19:00: Fyriskipararnir bjóða vælkomin og orðstýrarin presenterar skránna
Kl. 19:05: Fyrilestur
Kl. 19.20: 1. kjakumfar
Kl. 20.10: Steðgur
Kl. 20:25: Bárður Persson undirheldur við einum hugvekjandi skemtitátti
Kl. 20:35: 2. kjakumfar
Kl. 21:10: 3. kjakumfar
Kl. 21:45: Spurningar frá salinum
Kl. 22:00: Liðugt

Tiltakið byrjar í Norðurlandahúsinum kl. 19. Tey, sum ikki fáa komið, kunnu fylgja við umvegis internetið, tí tiltakið verður eisini stroymað. Leinkið verður deilt inni á facebook bólkinum fyri tiltakið. Tann bólkurin eitur "Veðurlagsbroytingar: Hvussu verða Føroyar leysar av oljuni?"