Í eini nýggjari bók, sum kemur út í dag, sigur danski forsætismálaráðharrin, Lars Løkke Rasmussen, at ein samgonga millum Sosialdemokratarnar og Vinstra er eitt gott val.

“Í galdandi politisku støðuni er tað eitt rætt val fyri Danmark, at vit fyri fyrstu ferð í meira enn 40 ár fáa eina stjórn tvørturum politisku miðjuna,” sigur hann.

Í bókini ger rithøvundurin og journalisturin, Kirsten Jacobsen, samrøðu við Lars Løkke Rasmussen, og í tí eina kapitlinum spyr hon forsætismálaráðharran, um hann kann ímynda sær eitt møguligt stjórnarsamstarv við Sosialdemokratarnar.

“Tað eru sjálvsagt nakrar avbjóðingar í tí, men samstundis er fyri mær eingin ivi um, at tað er eitt rætt uppskot. Nógvur politikkur verður longu førdur inniá miðjuni,” svarar Lars Løkke Rasmussen.

Sambært eini nýggjari veljarakanning standa Sosialdemokratarnir og Vinstri til at fáa tilsamans 45,6 prosent av atkvøðunum, sum gevur 83 tinglimir.