Seinastu viku í apríl gjørdi Magnus Heinason kanningar av havfrøði, æti og fiskalarvum á Landgrunninum.

“Hesa ársins tíð eru fiskalarvur frá gýting hjá fleiri fiskasløgum í sjónum, og føðiviðurskiftini hjá hesum fiskalarvum hava sum vera man stóran týdning fyri teirra livilíkindi,” sigur Havstovan.

Kanningarnar hjá Magnusi Heinasyni vístu, at gróðurin er seint á veg í ár. Lítið var av plantuæti og tað ávirkar djóraætið soleiðis, at nøringin av djóraæti hevur verið lítil. Fiskalarvur taka egg frá djóraæti og smátt djóraæti ta fyrstu tíðina og nøgdirnar av hesari føðini vóru smærri enn til dømis í fjør og fyrraárið. Hinvegin so var væl av reyðæti frá í fjør inni á Landgrunninum, sigur Havstovan. Tað er rikið inn á Landgrunnin í vár.

Havstovan sigur, at viðvíkjandi føðiviðurskiftunum fyri fiskalarvur, so tykjast umstøðurnar at vera toluligar, men undir miðal.

“Sløgini sóu út til at vera góð føði, men nøgdirnar av smáum æti frá í vár, kundu verið størri,” sigur Havstovan.

Kanningarnar hjá Magnusi Heinasyni vórðu gjørdar í tíðarskeiðinum frá 24. apríl til 1. mai.