Fundur í felagsnevndini millum Føroyar og EABS
Russland, Hvítarussland, Kasakstan, Kirgisia og Armenia eru limir í EABS.
Í gjár var fyrsti fundurin í felagsnevndini millum Føroyar og Eurasiatisku Búskskaparsamgonguna, EABS. Nevndin er sett á stovn sambært semjuskjalinum millum partarnar, sum var undirskrivað í Føroyum í august í fjør.
Russland, Hvítarussland, Kasakstan, Kirgisia og Armenia eru limir í EABS, sum er ein felags búskaparsamgonga, ið varð stovnað í 2015.
Poul Michelsen, landsstýrismaður, stóð á odda fyri føroysku sendinevndini, og Tatiana Valovaya, EABS ráðharri í búskaparmálum stóð á odda fyri EABS sendinevndini.
Felagsnevndin hevur til endamáls at virka fyri at styrkja samstarvið millum Føroyar og limalondini í EABS. Á skránni fyri fundin vóru handilsviðurskifti, tollviðurskifti, talgilding og heilsufrøðilig viðurskifti.
Partarnir løgdu fram síni politisku sjónarmið og ætlanir við samstarvinum, millum annað hvussu tolløkini hjá hvørjum øðrum eru skipað og hvørjar reglur eru galdandi, hvørjar heilsufrøðiligar mannagongdir eru, umframt leiklutin hjá talgilding í sínámillum viðurskiftum.
”EABS er okkara næststørsti marknaður fyri útflutningsvørur. Arbeiðið í felagsnevndini hevur tí stóran týdning í mun til at tryggja føroysk áhugamál mótvegis EABS, bæði av politiskum og tekniskum slag,” sigur Poul Michelsen.
Avrátt var, at næsti felagsnevndarfundur verður í Føroyum næsta ár.
Mest lisið í farnu viku
Samband
Heygsvegur 8
490 Strendur