Eitt uppskot um at gera eina gongubrúgv tvørtur um Sandá, millum Havn og Argir, kemur fyri á býráðsfundi í Havn í annaðkvøld.

“Úti í Sandágerði hevur ynski í longri tíð verið um at gera eina gonguleið tvørtur um Sandá, soleiðis at tað verður lætt atkomuligt til gongu millum Havnina og Argir,” sigur Tórshavnar kommuna á síni heimasíðu.

Byggi- og býarskipanarnevndin samtykti  tann 8. mai at taka undir við tilmælinum um at seta brúnna í verk, og tað sama gjørdi fíggjarnevndin tann 15. mai.

Ætlaða brúgvin og gøturnar til brúnna liggja innanfyri forn- og náttúrufriðaða økið í Sandagerði, og tí má ætlanin fáa góðkenning frá friðingarmyndugleikunum. Uppskotið er, at brúgvin verður gjørd í sama sniði, sum aðrar brýr í grønu økjunum í Havn.

“Útvalda sniðið er einkult og byggitøkniliga er sniðið tillagað økið, soleiðis at ikki verður neyðugt at hava stuðlandi súlur niður í ánna,” sigur Tórshavnar kommuna.

Brúgvin um Sandá skal vera partur av einum gøturingi, sum eftir ætlan skal ganga kring alla Havnina og knýta flestu frílendini í býnum saman.