Fótbóltsakademi Føroya og Vágs Skúli bjóða eitt øðrvísi 10. floks ár
Í samstarvið við Vágs Skúli bjóðar Fótbóltsakademi Føroya næmingum, sum fara í 10. flokk, møguleikan at velja eitt øðrvísi 10. floks ár í Vági við fótbólti sum høvuðsbreyt.
Vágs Skúli hevur komandi ár tveir 10. flokkar: Ein vanligan 10. flokk og ein 10. flokk við fótbólti sum høvuðsbreyt.
Næmingar, sum velja fótbóltsbreytina, fara at venja 5 ferðir um vikuna við Fótbóltsakademi Føroya um dagin og kunnu harumframt velja at venja við FC Suðuroy seinnapartin/um kvøldið. Venjarar eru Jón Pauli Olsen og Sigfríður Clementsen. Vant verður í Marghøllini, á ítróttarøkinum á Eiðinum og í Páls Høll.
Bústaðarviðurskiftini í Vági
Næmingar, sum koma til Vágs at ganga í 10. flokk, kunnu antin búgva hjá egnari familju, hjá vertsfamilju, ella í smáttunum, har næmingar á Ítróttaháskúlanum eisini hava bústað.
10. floks tilboðið í føroyska fólkaskúlanum er ókeypis, soleiðis eisini við 10. floks tilboðnum, sum verður skipað í samstarvi millum Vágs Skúla og Fótbóltsakademi Føroya. Næmingar, sum koma til Vágs at ganga í 10. flokki, koma tó at rinda fyri bústað og mat (um teir ikki búgva hjá egnari familju), tilsamans 3.000 kr. um mánaðin.
Tilmelding fer fram her á heimasíðuni hjá Fótbóltsakademi Føroya. Eru ivamál ella spurningar til fótbóltspartin á Fótbóltsakademi Føroya, so kann ringjast til Jón Paula Olsen, venjara, á tlf. 277927. Eru ivamál ella spurningar til fólkaskúlapartin, so kann ringjast til John Henrik Holm, skúlastjóra í Vágs skúla (tlf. 239330).
Lesið eisini meiri um Fótbóltsakademi Føroya á www.fotboltsakademi.fo og um Vágs Skúla á www.vagsskuli.fo.
Mest lisið í farnu viku
Samband
Heygsvegur 8
490 Strendur