Kristian Thulesen Dahl skrykkir teppið undan Mette Frederiksen
Biður sosialdemokratiska leiðaran velja ímillum eina samgongu við Vinstra og Danska Fólkaflokkin, ella at reka útlendingapolitikkin hjá flokkunum á vinstraveinginum.
Mette Frederiksen, forkvinna í danska Sosialdemokratiska flokkinum, skal ikki longur rokna við stuðli frá Danska Fólkaflokkinum í málum, har stuðulsflokkarnir á vinstraveinginum gerast ov truplir at fáast við. Tað ger Kristian Thulesen Dahl, formaður í Danska Fólkaflokkinum greitt í eini samrøðu við Børsen.
“Tað gerst meira og meira greitt, at hugsanin sum summi kanska hava havt, um at Danski Fólkaflokkurin skuldi koma inn og lúka fleiri ting burtur, sum hennara stuðulsflokkar krevja, - ta styrkina sær ikki út til at vit fara at fáa,” sigur Kristian Thulesen Dahl. Hann sær tí bara tveir møguleikar: Annaðhvørt má Mette Frederiksen skipa eina stjórn, sum byggir á stuðul frá flokkunum á vinstraveinginum, ella má hon skipa stjórn við Vinstra og Danska Fólkaflokkinum.
Vil ikki í stjórn við Vinstra
Síðani Lars Løkke Rasmussen, forsætismálaráðharri, lat upp fyri møguleikanum at skipa stjórn tvørturum miðjuna í donskum politikki, hevur Mette Frederiksen avgjørt víst hesum møguleikanum aftur. Men um Danski Fólkaflokkurin ikki vil stuðla Mette Frederiksen, uttan at vera partur av stjórnini, so hevur hon bara ein møguleika eftir, og tað eru flokkarnir á vinstraveinginum, sum allir vilja hava ein linari útlendingapolitikk. Tann politikkin vil Mette Frederiksen ikki hava.
Í einum sjónvarpskjaki sunnukvøldið gjørdi hon greitt, at breiða semjan um útlendingapolitikkin stendur við.
“Um eg skal reka ein annan útlendingapolitikk enn tann, sum eg eri sannførd um, er tann rætti fyri Danmark - nevniliga ein útlendingapolitikk, har vit hava skil á, hvussu mong koma hendavegin, so vil eg ikki vera forsætismálaráðharri,” segði hon.
Mette Frederiksen hevur havt ætlanir um at skipa eina reina sosialdemokratiska minnilutastjórn, sum skuldi samstarva bæði til vinstru og høgru, alt eftir hvørji málini vóru, og Danski Fólkaflokkurin hevur líka til nú verið opin fyri hesum samstarvinum. Men seinastu veljarakanningarnar hava víst, at Danski Fólkaflokkurin fer at fáa eitt somikið vánaligt val, at hann verður ikki nóg stórur til at kunna stuðla Mette Frederiksen í málum, har flokkarnir vinstrumegin miðjuna ikki fáast at ganga í takt.
Sambært nýggjastu veljarakanningini stendur Danski Fólkaflokkurin til at fáa 11,8 prosent av atkvøðunum. Hann fekk 37 prosent á seinasta vali.
Kelda: TV 2
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur