Afrikansk svínapest, sum eingin vaksina finst ímóti, hevur minkað munandi um svínaídnaðin í Kina, sum er nógv tann størsti í heiminum. Hollendski bankin, Rabobank, sum veitir lán til altjóða landbúnaðin, roknar við, at kinesiski grísastovnurin kann fara at minka við einum triðingi í ár.

Hetta merkir, at útvið 200 milliónir grísar fara annaðhvørt at doyggja av sjúkuni ella at verða avlívaðir av trygdarávum. Tað svarar næstan til samlaða talið av grísum, sum eru í USA og ES.

Matvøru- og landbúnaðarstovnurin hjá ST, FAO, sigur, at kinesisku myndugleikarnir hava gjørt tað rætta, fyri at fáa bilbugt við sjúkuni. Kortini kunn ár ganga, áðrenn vunnið verður á sjúkuni, tí kinesiski grísaídnaðurin er samansettur av fleiri túsund smærri gørðum, sum ikki eru væl egnaðir til at forða smittuspjaðing.

Sjónvarpsstøðin CNN sigur, at kinesiska svínapestin kann fáa búskaparligar avleiðingar fyri allan heimin. Kina er heimsins størsti brúkari av svínakjøti, og mett verður, at prísirnir á svínakjøti kunnu seta met í seinnu hálvu av 2019, tá útboðið verður minni enn eftirspurningurin.

CNN endurgevur greinarar fyri at siga, at tað verður ov lítið til av svínakjøti í heiminum til at nøkta kinesiska tørvin, og tað kann økja um eftirspurningin av øðrum kjøti. Sambært Rabobank fer eitt skifti at henda í kinesiska innflutninginum av matvørum, sum vit ikki hava sæð fyrr.

Kelda: Euroinvestor