Nýggi bygningurin á Sundsverkinum, Støð 3, sum millum annað hýsir nýggju motorunum, er nú komin somikið væl áleiðis, at reisigildi varð hildið hósdagin í farnu viku.

SEV sigur, at byggiarbeiðið verður væntandi liðugt í ár, og ætlanin er at fara undir royndarframleiðslu í heyst.

“SEV strembar áhaldandi eftir so nógvari grønari orku sum gjørligt. Tó er neyðugt at byggja Sundsverkið út við einari støð 3, tí oljan verður framvegis neyðug tiltakstrygd, eisini tá elorkan á landi í Føroyum verður 100 prosent grøn í 2030,” sigur SEV.

Felagið sigur, at hóast talan er um eitt oljurikið verk, so skal Sundsverkið hóska so væl sum gjørligt til grønu framtíðina. Stórur dentur verður lagdur á at reinsa roykin frá verkinum, og eisini kunnu motorarnir tillagast til at brenna gass í staðin fyri olju, um ein gassgoymsla verður bygd í Føroyum seinni.

Byggingin av nýggja Sundsverkinum fór í gongd í februar 2017, og arbeiðið hevur gingið sum ætlað.