Seinnapartin í gjár var móttøka í skúlanum hjá Dugna við Áir í sambandi við at skúlin er liðugt umvældur.

Arbeiðið at umvæla skúlan varð boðið út í høvuðsarbeiðstøku, og lisitatión var í september 2018. Sáttmáli við JEP-Smíð varð eisini undirskrivaður í september 2018, og arbeiðið fór síðani í gongd beinanvegin.

Tað hava verið samanlagt 3 byggistig. Byggistig 1 og 2 vóru gjørd í einum og fevndu um útbygning, skúlastovu, køk, matarsalin í stovuhæddini, 6 kømur og lærarastovuna á 2. hædd.

Byggistig 3 fevndi um dagføring av einum undirvísingarhøli, kliva og samtalurúmi í stovuhæddini, umframt 2 kømur við vesi og vaskirúmi á 2. hædd.

Fyri at gagnnýta jarðarhitan, fingu dagførdu rúmini eisini gólvhita, umframt at bjálvað er millum hæddir og útveggir. Umvælingararbeiðið hevur gingið væl, og tíðar- og kostnaðarætlan hava hildið.

Arbeiðið at umvæla skúlan við Áir kostar 4 mió. krónur.