BankNordik vann fríggjadagin bronsuvirðisløn á stórari samkomu hjá Creative Circle í Keypmannahavn. Virðislønir vórðu latnar fyri ársins bestu avrik innan marknaðarføring, og BankNordik vann bronsu í bólkinum “Digital / Technology Driven Promo & Activation”.

Virðisløninina fekk bankin fyri sonevnda “volapyk-knøttin”, sum er á donsku heimasíðuni hjá bankanum. Endamálið við knøttinum er at geva lesarum møguleika at gera vart við torskildan tekst á heimasíðuni, soleiðis at hann kann verða orðaður greiðari og harvið gerast lættari at skilja. Hetta mettu dómararnir vera so mikið uppfinningarsamt og væl úr hondum greitt, at virðislønin varð latin fyri knøttin.

“Volapyk-knøtturin er eitt av fleiri tiltøkum, ið BankNordik hevur sett í verk til tess at gera tað lættari hjá viðskiftafólkunum at skilja samskiftið við bankan,” sigur bankin á síni heimasíðu.

Knøtturin verður ætlandi eisini at finna á føroysku heimasíðuni hjá bankanum seinni í ár.