Streymmátarar tiknir upp
Magnus Heinason hevur verið ein túr, har broytingar í havinum kring Føroyar vórðu kannaðar.
Mikudagin í farnu viku kom havrannsóknarskipið, Magnus Heinason, aftur av einum sonevndum hydrografitúri. Tað skrivar Havstovan á síni heimasíðu
Endamálið við túrinum var at fylgja við broytingunum í havinum kring Føroyar, og túrurin var ein partur av teimum regluligu kanningunum eftir teimum sokallaðu seks standardskurðunum.
Túrurin byrjaði vestanfyri, har tvær fortoyningar vórðu tiknar upp. Seinni á túrinum blivu tríggjar fortoyningar tiknar upp norðanfyri, og ein fortoying og ein ramma blivu tiknar upp á Fugloyartunguni. Hesar fortoyningar hava allar streymmátarar og aðra mátiútgerð á sær, og endamálið við teimum er at máta rákið í Føroyastreyminum, og hvussu stórur partur av tí fer inn í Hetlandsrennuna, eins og at tað djúpa rákið í Bankarennuni verður mátað.
Á túrinum vórðu eisini data lisin av einum hitamátara á botni, og tveir hydrografiskir skurðir blivu tiknir: Úr Nólsoy til Hetlands, og longri suðuri í Hetlandsrennuni og inn á Munkagrunnin.
Túrurin byrjaði 16. mai og hann endaði 22. mai.
Mest lisið í farnu viku
Samband
Heygsvegur 8
490 Strendur