Í dag hevur Føroya Tele tendrað 5G
Hjá Føroya Tele fegnast tey um at ganga á odda og um at hava tendrað framkomnu 5G-tøknina í dag. Tað skrivar Vágaportalurin seinnapartin.
5G-skipanin hjá Føroya Tele er hósdagin 6. juni 2019 sett í verk, og fyrsta 5G-tólið hevur longu koyrt á netinum. Komandi vikurnar verður nýggja tøknin royndarkoyrd innanhýsis á Føroya Tele, áðrenn kundar hjá Føroya Tele koma á nýggja 5G-farnetið á trimum útvaldum støðum seinni í summar, verður kunngjørt.
Hans Jákup Langgaard, stjóri í FT Samskifti staðfestir, at tað hevur stóran týdning, at farnetið hjá Føroya Tele er tað fyrsta í Føroyum at fáa nýggju tøknina, og at Huawei metir Føroya Tele á jøvnum føti við stóru, altjóða fyritøkurnar, ið somuleiðis hava sett hol á teirra arbeiði við 5G.
– Vit stremba eftir tindunum og ynskja at vera fremst á øllum økjum, og tí er tað ein greiður fyrimunur fyri okkum tøkniliga, at vit fáa fremstu atgongd til 5G og tey tól, sum stuðla nýggju tøknini. Eftir ætlan fáa kundar hjá Føroya Tele atgongd til 5G á útvaldum støðum seinni í summar, sigur Hans Jákup Langgaard sambært Vágaportalinum.
Einki verður nevnd um, at fleiri enn 1000 mótmælisundirskriftir eru savnaðar av føroyingum, sum ikki ynskja at føroyingar skulu verða millum fyrstu í heiminum at fáa 5G-net. Fólk bera serliga ótta fyri elektromagnetisku strálingini frá 5G tøknini.
Poul Michelsen, landsstýrismaður í vinnumálum, hevur sagt við Kringvarp Føroya, at tær altjóða kanningar, sum eru gjørdar um 5G-net, ikki vísa nakað um, at tað er heilsuskaðiligt. Men, formaðurin í Fólkaheilsuráðnum, Magnu Mohr, hevur víst hesum aftur.
Sambært Kringvarpinum segði Magni Mohr, at "tað er ikki neyðturviliga rætt, at einki er at stúra um viðvíkjandi heilsuárinunum frá nýggja 5G-netinum, sum verður sett upp í Føroyum, soleiðis sum Poul Michelsen, landsstýrismaður í vinnumálum, vil vera við.
Magni Mohr sigur, at kanningarnar, sum landsstýrismaðurin vísir til, eru gjørdar í mun til krabbamein, og tær vísa ikki øktan vanda fyri krabbameini. Men strálurnar kunnu ávirka kyknir, og mann veit ikki, hvat hendir, um mann er úti fyri slíkum strálum frá móðurlívi og gjøgnum øll barnaárini.
Formaðurin í Fólkaheilsuráðnum, Magni Mohr, heldur at best hevði verið at sett ein arbeiðsbólk at kanna og lýsa málið um 5G-net í Føroyum.
Tilmælið hjá formanninum í Fólkaheilsuráðnum hevur verið ignorerað av vinnuni og politikkarunum. Og, í dag fegnast tey hjá Føroya Tele um, at føroyingar hava fremstu samskiftistøknina í heiminum.
"Nú taka vit eitt risafet inn í framtíðina og kunnu sostatt ásanna, at vit varðveita Føroyar á ovastu rók, tá ið talan er um samskiftistøkni" sigur Hans Jákup Langgaard, stjóri í FT Samskifti, sambært Vágaportalinum.
Mest lisið í farnu viku
Samband
Heygsvegur 8
490 Strendur