Væleydnaður skúlafótbóltur í Vági
Fleiri enn 2.400 leikarar hava luttikið í skúlafótbóltinum í Vági í 2018/2019. Fótbóltskappingin verður aftur komandi skúlaár, boða fyriskipararnir frá í tíðindaskrivi
Fyri einum lítlan mánaða síðani var finalan í Skúlafótbólti í Marghøllini í Vági. Talan var helst um eitt tað størsta fótbóltstiltakið í Føroyum nakrantíð, tí umleið 750 børn kappaðust til finaludagin í Skúlafótbólti.
Tá farið varð undir tiltakið tíðliga á sumri 2018 høvdu vit eina vón um at fáa eini 5-600 næmingar til hetta fyrsta árið hjá Skúlafótbólti. Men nú vit hava gjørt árið upp, kunnu vit staðfesta, at tað hava verið 2.409 leikarar, sum hava luttikið í Skúlafótbólti 2018/2019.
Tilsamans hava tað verið umleið 27% av øllum næmingunum í føroyska fólkaskúlanum til Skúlafótbólt 2018/2019. Fyri summar árgangir, t.d. 5., 6. og 7. flokk, vóru tað fleiri enn 40% av næmingunum, sum luttóku til Skúlafótbólt. 25 fólkaskúlar og 5 miðnámsskúlar luttóku í Skúlafótbólti 2018/2019.
Tilsamans 221 lið kappaðastu til Skúlafótbólt, býtt á 69 dreingjalið, 56 gentulið og 96 blandaði lið. Hesi liðini spældu tilsamans 596 dystir. Tilsamans blivu 3.448 mál skoraði til Skúlafótbólt kappingarárið 2018/2019. Hetta skriva fyriskipararnir í tíðindaskrivi til fjølmiðlarnir.
Boðað verður eisini frá, at fyrireikanin til Skúlafótbólt 2019/2020 eru farin í gongd og verða skriv send út til skúlar og miðnámsskúlar í næstum við meira kunning. Meiri verður eisini at frætta um tilmelding og annað á heimasíðuni hjá Skúlafótbólti, www.skulafotboltur.fo
Mest lisið í farnu viku
Samband
Heygsvegur 8
490 Strendur