Norðurlendskir tónlistadagar 2020 verða í Føroyum
Felagið Føroysk Tónaskøld verða, saman við Dansk Komponistforbund og í samstarvi við Norðurlandahúsið, vertir fyri elsta tónleikafestivalinum í Evropa. Tað verður í døgunum 24.-27. september 2020 í Norðurlandahúsinum.
Norðurlendskir tónlistadagar ella Nordic Music Days vórðu fyrstu ferð hildnir í 1888 og hava síðan tá ferðast ímillum ymsu norðurlondini, sum eru limir í Nordisk Komponistforbund. Hetta er tó fyrstu ferð at dagarnir verða hildnir í Føroyum og Norðurlandahúsið verður miðdepilin fyri festivalin.
Kristian Blak, formaður í Felagnum Føroysk Tónaskøld fegnast um, at festivalurin kemur til Føroya: ”Felagið Føroysk Tónaskøld hevur tikið lut í norðurlendskum og øðrum altjóða virksemi síðani felagið var stovnað í 1987. At Norðurlendsku Tónlistadagarnir eru settir at fara fram í Føroyum í 2020 er ein viðurkenning av støðinum og áhaldandi virkseminum hjá felagnum innan nýskapandi og eksperimenterandi tónleiki.”
Evnið í 2020 er ”Røtur”, og ein lýsing eftir hugskotum og verkum er send tónaskøldum og øðrum í øllum Norðurlondum.
Skráin fyri dagarnar verður sett saman av einum norðurlendskum kuratortoymi við umboðum fyri ymsar serkunnleikar innan listatónleik og áhoyraramenning. Tey, ið manna toymið eru: Sunleif Rasmussen (FO), Tine Louise Kortermand (DK), Anna Boukris (DK) og Gunnar Karel Másson (IS).
Lesið meira um festivalin og lýsingina eftir hugskotum og verkum á heimasíðuni hjá Norðurlandahúsinum her.
Mest lisið í farnu viku
Samband
Heygsvegur 8
490 Strendur