Amerikanska verjumálaráðið, Pentagon, fer at senda 1.000 hermenn til Miðeysturs. Virkandi verjumálaráðharrin, Patrick Shanahan, kallar avgerðina fyri eina roynd at “økja um trygdina við amerikansk áhugamál” í økinum, skrivar tíðindastovan AP.

Avgerðin um at senda fleiri hermenn til Miðeysturs kemur samstundis sum spenningurin millum USA og Iran økist.

USA hevur lagt Iran undir at standa aftanfyri álopini á tvey tangaskip í Omanvíkini í farnu viku, men Iran noktar fyri at hava havt nakað við hendingarnar at gera.

USA hevur frammanundan dubba seg nógv í Miðeystri, síðani Donald Trump, forseti, tók avgerð um at taka USA úr altjóða avtaluni um kjarnorkuætlanina hjá Iran.

“USA roynir ikki at skapa stríð við Iran. Okkara gerðir skulu síggjast sum ein trygging av trygdini hjá okkara fólkum í øllum økinum, og sum eina verju av okkara flota,” segði Patrick Shanahan, verjumálaráðharri.

Ein talsmaður hjá Iran segði í gjár, at landið fer at økja um ríkanina av urani við upp til 20 prosentum, sum avleiðing av, at USA hevur sett fleiri strangar revsiatgerðir  í verk móti iranska búskapinum og móti londum, sum innflyta iranska olju.