20. juni var ein søguligur dagur á Kambsdali. Fyrsti miðnámsskúlaflokkurin eftir nýggju skipanini fyri Serligt skipað miðnám fekk nevnilig húgvuna. Hetta er eitt stórt framstig fyri at tryggja rættindum hjá fólki við serligum avbjóðingum í samfelagnum, skrivar Miðnám á Kamsdali á heimasíðu síni.

Vakra nýggja húgvan, sum nú er at síggja millum floygdu pisurnar, hevur svartar, gular og grønar strípur. Litirnir bera boð um orku, vón, vøkstur og styrki. Hetta eru eginleikar, sum eyðkenna hesi ungu, sum nú við stoltleika kundu gleðast um fýra mennandi og minnilig ár á Kambsdali.

Hesir næmingar, hava gingið lið um lið við aðrar miðnámsskúlanæmingar á Miðnámi á Kambsdali, men í teirra egnu serligu skipan. Hvør einstakur fær eitt prógv, sum við sokallaðum OCN-stigum lýsir teirra førleikar innan nógv ymisk øki, og ætlanin við skúlagongdini er sjálvstøðug lívsførsla, sigur Birna Heinesen, sum hevur undirvíst næmingunum í leiklist.

"Miðnám er við hesum ikki bara bøkur og próvtøkur sum vit kenna tær, men rúmar eisini teimum, ið hava tørv á førleikamenning í aðrar mátar...Serbreytin má sigast at vera nakað, sum øll hava lært sera nógv av, ikki minst næmingarnir á hinum breytunum, sum hitta hesar næmingar hvønn dag, og sjálvandi eisini vit lærarar og leiðslan!" sigur Birna Heinesen.