“Tá klokkan nærkaðist 22.30 í kvøld komu svarini til tey, sum hava søkt um menningarkvotur!” Tað skrivaði Kristian Martin Petersen, formaður í felagnum Línuskip, á facebook í gjárkvøldið. Hann undrast á skipanina.

“Umsøkjararnir fingu umleið tvær vikur at skriva umsóknir, Fiskimálaráðið brúkti fleiri fulltíðarstørv og góðar 4 mánaðir at avgreiða umsóknirnar, sum tað mesta av tíðini hava ligið svaraðar í málaráðnum,” sigur hann.

Kristian Martin Petersen vísir á, at argumentini, sum verða brúkt fyri og móti teimum einstøku verkætlanunum eru umleið tey somu, alt eftir hvør tað er, sum hevur søkt. 

“Í fjør var kritikkurin millum annað, at vit høvdu eina langtíðarætlan, men ein onnur umsókn fekk tá játtandi svar, júst tí at viðkomandi hevði eina langtíðarætlan.”

Ein annar umsøkjari, Frímund Hansen, skrivar, at hansara virki fekk noktandi svar við teirri grundgeving, at virksemið er í Klaksvík.

“Kundi man so ikki bara sagt tað beinanvegin, at umsóknir úr Norðoyggjum verða ikki gingnar á møti?” spyr hann.

Fiskimálaráðið hevur enn ikki boðað frá, hvør fekk og hvør ikki fekk menningarkvotu í ár.