“Sandoyar Tjóðveldisfelag hevur heitt á meg um at stilla upp til Løgtingsvalið, og eg havi avgjørt at játta. Flokkurin hevur tørv á eini mótvekt til tað linju, ið verandi leiðsla hevur lagt. Avgreiðslan, og útlutanin av menningarkvotunum, er enn eitt tekin um tað.” Tað skrivar Páll á Reynatúgvu, løgtingsmaður fyri Tjóðveldi, á facebook.

Hann sigur, at spenningur hevur verið á Sandoynni í sambandi við útlutingina av menningarkvotunum hesaferð. 

“Eg visti, at umsøkjarar úr Sandoynni høvdu fyrireikað seg væl, og umfatandi ætlanir eru á borðinum. Ætlanir, ið kundu lyft økið aftur, so sum ætlanin við menningarkvotunum er,” sigur Páll á Reynatúgvu.

“Hesir umsøkjarar hava bíðað í spenningi, meðan landsstýrismaðurin í onkrum slagi av atgerðarloysi enn einaferð læt vinnuna bíða eftir sær,” sigur hann.

Og Páll á Reynatúgvu letur ongan iva vera um, at hann er vónbrotin, nú menningarkvoturnar eru býttar.

“Nú úrslitið – fleiri mánaðir ov seint – verður kunngjørt, er vónbrotið stórt, tí Sandoyggin aftur bert fekk molarnar av Høgnasa borði. Freistandi er at halda at metingarnevndin er politiska skálkaskjólið hjá landsstýrismanninum,” skrivar Páll á Reynatúgvu.

Hann sigur seg til tað síðsta hava havt vónir um, at Sandoyggin fekk ein lítlan møguleika aftur at gera seg galdandi á fiskivinnuøkinum. Men við “smáum molum”, ið einans eru galdandi fyri eitt ár, er torført at byggja nakað varandi upp. 

“Tann skaði, ið manglandi evnini hjá landsstýrismanninum at avgreiða mál hevur gjørt á okkara einaferð so stolta flokk, er ringur at spáa um,” skrivar Páll á Reynatúgvu.