Páll á Reynatúgvu: Standi við tað, sum eg havi sagt
Í eini grein á facebook í morgun ger Páll á Reynatúgvu greitt, at hann tekur einki aftur av tí, sum hann hevur sagt.
Páll á Reynatúgvu, løgtingsformaður, ger nú púra greitt, at hann stendur við tað sum hann hevur sagt um landsstýrismannin við fiskivinnumálum og um menningarkvoturnar.
“Eg tosi við Høgna Hoydal javnan, og havi eisini gjørt tað í morgun. Men tað broytir ikki, at eg haldi, at mín kritikkur hevur verið sakligur og erligur, og hann standi eg við,” skrivar hann á facebook í morgun.
“Hvør kann vísa aftur at avgreiðslan av menningarkvotunum hevur verið óvanliga drúgv, serliga havandi í huga, at hon bert er eitt eftirlit av einum arbeiði, hjá einari nevnd. Tíanverri er tilgongdin ein endurtøka av støðuni í fjør, og hetta er ikki ein avgreiðslutíð, ið vit kunnu bjóða okkara vinnu,” sigur Páll á Reynatúgvu.
“Í Føroyum og í Tjóðveldi hava vit loyvi at finnast at, hvussu vit politikkarar umsita tað vald, ið vit hava fingið frá fólkinum. Í so máta er eingin hevjaður. Hvørki løgtingsformaðurin, ella fiskimálaráðharrin,” sigur hann.
Páll á Reynatúgvu er staddur uttanlands, og haðani hevur hann skrivað eina grein, sum hann hevur lagt út á facebook. Greinin endar við orðunum:
“Eg havi altíð verið ein viðleikari á liðnum, men eisini ein mótvekt hjá Høgna. Men eg eri ikki ein blindur stuðul, og eg gevi formanninum mótspæl tá hann hevur tað fyri neyðini. Og tá flokkurin hevur tað fyri neyðini
Tað standi eg við. Eisini um boðskapurin er illa lýddur.”
Mest lisið í farnu viku
Samband
Heygsvegur 8
490 Strendur