“Av trygdarávum og fyri skúvoyingar og føroyingar sum heild, eigur Suðuroyartunnilin at koma upp í Skúvoy.” Tað sigur Landsverk, sum mælir til at gera tveir styttri tunlar í staðin fyri ein langan.

Landsverk sigur, at ein langur tunnil er munandi meira avbjóðandi fyri trygdina, og harumframt heldur stovnurin tað vera ógvuliga óskynsamt at lata tunnilin koma upp við Skarvanes í staðin fyri norðanfyri bygdina á Sandi. 

“Hetta fer bæði at økja um samlaða teinin millum Sandvík og Tórshavn, eins og landið tá má gera stórar íløgur í avleiddar verkætlanir við Sandslíð og í Sands bygd, har ferðslan skal leiðast ígjøgnum,” sigur Landsverk.

Mæla frá at stovna partafelag nú

Heðin Mortensen, landsstýrismaður við samferðslumálum, boðaði í farna mánaði frá, at hann tá fór undir fyrireikingarnar til at stovna partafelagið Suðuroyartunnilin, men hesum mælir Landsverk frá.

“Verkætlanin er als ikki búgvin til tað, og mælt verður til at gera fleiri kanningar av millum øðrum fíggingarleisti og avleiðingum fyri samfelagið, umframt jarðfrøðiligar og trygdarkanningar,” sigur Landsverk.

Stovnurin mælir til, at hesar fyrireikingar vera gjørdar í almennu fyrisitingini, har arbeitt verður við heildaratlitum, og har verkætlanin verður sædd í einum størri og breiðari høpi. 

“Tá fyrireikingararbeiðið er liðugt, og støða er tikin til, hvussu verkætlanin skal fíggjast, og hvar tunnilin skal gerast, er klárt at gera eitt partafelag at byggja og reka tunnilin, um tann loysnin verður vald,” sigur Landsverk.

Roknað verður við, at Suðuroyartunnilin fer at kosta umleið tríggjar milliardir at gera.