Stríðið millum hummarafiskarar og alarar í Norðoyggjum heldur fram, og nú skrivar Sólarn Isaksen, sum í mong ár hevur fiskað hummarar í Haraldsundi, at Heilsufrøðiliga Starvsstovan vil hava hann vekk av økinum.

Í eini viðmerking á facebook skrivar hann, at Heilsufrøðiliga Starvsstovan hevur givið honum eina freist at flyta hummaraútgerðina av aliøkinum hjá Bakkafrost innan mánadagin, annars útvegar Starvsstovan eitt far, sum flytur útgerðina fyri hansara rokning. 

Sólarn Isaksen sigur, at hummarafiskimenninir vóru í Haraldsundi langt áðrenn Bakkafrost kom har.

Vit hava ringt til Heilsufrøðiligu Starvsstovuna, fyri at spyrja um hetta, men har verður telefonin ikki tikin.