Í síðstu viku kom ein journalistur frá Dimmu á vitjan at tosa um bústaðarneyð o.s.fr. Sjálvur eri eg sum so nøgdur við greinina, og eg meti at journalisturin hevur verið rímiligur í síni grein.

Beint sum okkurt kom at lesa á facebook, ringdi ein vinmaður og spurdi hvat hetta var fyri bolshevikkiskt møsn eg kom við. Tá skilti eg á lagnum, her má helst eitt skriv koma mótsatta vegin sum skjótast. 

Eg segði ymsikt um hvat og hvussu, men høvuðsboðskapurin var, at tað kann ikki vera rætt at borgarar í eini kommunu, umvegis skattin, skulu gjalda fyri tænastur til borgarar, ið als ikki hava bústað í kommununi og harvið einki rinda til lokala felagskassan.

Hví skulu skattagjaldararnir í eitt nú Eiðis kommunu rinda fyri vatn, kloakk, vegir, sløkkilið o.s.fr. hjá einum borgara, ið als ikki er búsitandi í kommununi. Skalt tú vera partur av eini skipan/bygd/kommunu, so er neyðugt, at tú eisini ert við at gjalda fyri tænasturnar á staðnum. 

Man kann gera eitt simpult roknistykki har man býtir samlaða kostnaðin fyri vatn, kloakk, vegir, sløkkilið o.s.fr. við samlaða talið av húsum í kommununi. Við hesum fæst ein veruligur kostnaður fyri tænastur til hvørt hús. Ert tú skattgjaldari í kommununi, so rindar tú longu fyri hesar tænastur, ert tú ikki búsitandi í kommununi, ella er eingin ið hevur bústað í tínum húsum, so mást tú rinda kostnaðin á annan hátt. 

Lagaliga løtan at gera tílíkar broytingar er beint nú. Vit hava eina bústaðarneyð, sum kann koma at kosta okkum dýrt, og møguliga ein tílík rættvís skipan hevði gjørt, at fleiri tóm hús blivu leigaði út til fastar bústaðir. 

Vit skulu ikki vera bangin fyri at gera lógir og broytingar sum bara passa til okkara samfelag. Tann dagin vit læra, at lógirnar ikki nýtast fyrst at koma úr ES ella Danmark og síðani til Føroyar, tann dagin koma vit at fáa skipað hetta landið til føroyingar. 

Føroyskar lógir til eitt føroyskt samfelag.

Soleiðis skrivar Jógvan í Skorini, borgarstjóri á Eiði á facebook vanga sínum.