Semja um at skipa altjóða menningarsamstarv
Poul Michelsen, landsstýrismaður í uttanríkis- og vinnumálum, og Sigurð í Jákupsstovu, rektari á Fróðskaparsetri Føroya, skrivaðu fyrrapartin hósdagin undir semjuskjal um at skipa ein leist fyri altjóða menningarsamstarv. Tað ber í sær, at Føroyar í størri mun fara at brúka vitan og førleikar í samstarvi við menningarlond, skrivar Setrið á heimasíðu síni.
Átøkini eru við til at røkja fleiri av teimum 17 heimsmálunum hjá ST fyri burðardyggari menning. Serligur dentur verður lagdur á fjórða heimsmálið, sum er at tryggja øllum inkluderandi og rættvísa dygdargóða útbúgving og virka fyri lívlongum læringarmøguleikum fyri øll.
Menningarsamstarvið skal virka fyri útbúgving, gransking, vitanardeiling og átøkum, ið skulu breiða út vísindaliga vitan og serkunnleika í menningarlondum og smáoyggjaríkum.
- At vit í Føroyum fara út í heim at læra frá okkum verður vónandi áhaldandi til gagns fyri menningarlondini, samstundis sum vit fáa størri innlit í, hvussu menningarlond skipa síni viðurskifti, sigur Poul Michelsen, landsstýrismaður.
Eisini Sigurð í Jákupsstovu væntar, at Fróðskaparsetrið fær nógv burturúr menningarsamstarvinum.
- Vitanardeilding og altjóða granskingarsamstarv gongur báðar vegir, og eg ivist ikki í, at hetta verður eitt virðismikið íkast hjá okkum, sigur hann.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur