Poul Michelsen, landsstýrismaður, hevur nú lýst ta sokallaðu “Vatnskutarakunngerðina”.

Í kunngerðini verða ásett krøv til teirra, sum sigla við vatnskutara, luftpútufari ella øðrum líknandi fari.

Ein treyt fyri at vera førari á hesum førum er, at tú skalt vera fyltur 16 ár og hava føraraprógv frá góðkendum skeiðsveitara. Førarin skal hava hetta prógvið uppiá sær, tá siglt verður, og tað skal verða víst Sjóvinnustýrinum, løgregluni ella øðrum eftirlitsmyndugleika, tá biðið verður um tað.

Tann sum siglir við hesum førunum skal nýta bjargingarvest og skal vera ílatin hóskandi kuldabjálvandi drakt. Um draktin hevur flotføri sum ein bjargingarvestur, er ikki neyðugt at brúka bjargingarvest.

Kunngerðin er longu komin í gildi, men treytin um føraraprógv kemur tó ikki í gildi fyrr enn 1. januar 2021.