“Tørvur er á eini samlaðari ætlan fyri útoyggjar, fyri at lyfta tær upp á eitt hóskandi støði, tá ræður um undirstøðukervi og tænastu.” Tað sigur Landsverk í framhaldsútgávuni av Samferðsluætlanini 2018-2030, sum kom út tann 5. juli.

Landsverk sigur, at hetta er bæði til gagns fyri bygdafólkið, og ger at oyggjarnar kunnu vera førar fyri at taka ímóti tí lutfalsliga stóra ferðafólkastreyminum, sum vitjar á hvørjum ári.

“Til frama fyri økismenningina á útoyggj eiga viðkomandi almennir stovnar, kommunur, bygdir, einstaklingar og onnur áhugað at virka fyri, at røtt javnvág er millum tað vinnuliga, mentanarliga og sosiala støðið á øllum oyggjum,” stendur í framhaldsútgávuni av Samferðsluætlanini. 

Mælt verður til, at heildarætlanin fyri útoyggjar millum annað skal viðgera endurnýggjan av flotanum hjá Strandferðsluni, farmaflutning og betran av samferðslumøguleikunum sum heild. 

“Við eini slíkari útoyggjaætlan kunnu Landsverk og Strandferðslan lættari at røkja samferðslutørvin á og til útoyggjar,” sigur Landsverk.

Mælt verður eisini til, at núverandi samanseting av ognarskapinum av havnum og ferjulegum, sum er býtt millum Landsverk og kommunurnar, verður løgd í eina hóskandi legu. Hetta soleiðis, at allar havnir í hvussu er verða hildnar viðlíka.

“Harafturat eigur ein støðumeting av øllum havnum at verða gjørd og síðani ein ítøkilig virkisæltan, ið greitt lýsir, hvussu farast skal fram. Herundir at gera kostnaðarmetingar av tí, sum gerast skal,” sigur Landsverk.